Mark 12

Umzekeliso Wabaqatshi Besivini

1Wasekhuluma kubo ngemizekeliso: “Indoda yahlanyela isivini. Yakha umduli yasihonqolozela, yemba igodi lesihluzo yasisakha umphotshongo wesilindo. Yasiqatshisa isivini kubalimi abathile yona yasuka yathatha uhambo. 2Ngesikhathi sokuvuna yathuma isisebenzi kubaqatshi besivini ukuthi siyothatha ingxenye yezithelo zesivuno. 3Kodwa basidumela basitshaya basixotsha singaphathanga lutho. 4Yathuma esinye isisebenzi kubo; leyondoda bayitshaya ekhanda bayiphatha kubi. 5Yaphinde yathuma esinye njalo isisebenzi, leso bahle basigongoda basibulala. Yathuma ezinye ezinengi; ezinye zazo bazitshaya, ezinye bazibulala.

6“Kwasekusele oyedwa wokuthuma, indodana, ayeyithanda. Wayithuma ekucineni kwabo bonke esithi, ‘Bazayihlonipha indodana yami.’

7“Kodwa abaqatshi besivini batshelana bathi, ‘Lo uyindlalifa. Wozani, kasimbulale, ilifa libe ngelethu.’ 8Ngakho bamthatha bambulala bamphosela ngaphandle kwesivini.

9“Kambe kuyini azakwenza umnini wesivini na? Uzakuza ababulale abaqatshi besivini labo aphe isivini leso kwabanye. 10Kaliwufundanga yini umbhalo lo othi: “ ‘Ilitshe elaliwe ngabakhi seliyilona eliluphawu egunjini;

11INkosi ikwenzile lokhu, kuyamangalisa emehlweni ethu’?”

12Basebedinga iqhinga lokumbopha ngoba babesazi ukuthi wayekhulume umzekeliso lowo eqonde bona. Kodwa besaba ixuku labantu; basebemtshiya bahamba.

Ukuthela kuKhesari

13Muva basebethumela abanye babaFarisi lamaHerodi kuJesu ukuthi bambambe ngamazwi akhe. 14Beza kuye bathi, “Mfundisi, siyakwazi ukuthi uyindoda eqotho. Kawuguqulwanga ngabantu ngokuba kawulandeli ukuthi bangobani; kodwa ufundisa indlela kaNkulunkulu mayelana leqiniso. Kulungile yini ukuthela kuKhesari, kumbe hatshi? 15Sithele yini kumbe hatshi?” Kodwa uJesu wayekubona ukuzenzisa kwabo, wathi, “Lizamelani ukungithiya na? Ake lingiphe idenariyo ngibone.” 16Baluletha uhlamvu lolo, wasebabuza wathi, “Ngumfanekiso kabani lo? Lombhalo ngokabani?” Baphendula bathi, “NgokaKhesari.”

17UJesu wasesithi kubo, “Phanini uKhesari okukaKhesari loNkulunkulu okungokukaNkulunkulu.” Bamangala kakhulu ngaye.

Ukuthathana Lokuvuka Ekufeni

18Kwasekusithi abaSadusi abathi kakulakuvuka ekufeni, beza kuye belombuzo.

19Bathi, “Mfundisi, uMosi wasibhalela ukuthi uma umfowabo wendoda angafa atshiye umfazi kodwa kungelabantwana, leyondoda kayimthathe umfelokazi izalele umfowabo abantwana. 20Manje-ke kwakulabafowabo abayisikhombisa. Owokuqala wathatha wasesifa engazalanga. 21Owesibili wamthatha umfelokazi, waphinda laye wafa engelamntwana. Kwabanjalo lowesithathu.

22Iqiniso yikuthi kakho kubo bonke bosikhombisa owaba labantwana. Ekucineni kwafa yena umfazi. 23Ekuvukeni kwabafileyo uzakuba ngumfazi wawuphi njengoba bonke bosikhombisa babetshade laye?”

24UJesu waphendula wathi, “Kalilahleki yini ngokuba lingayazi imibhalo loba amandla kaNkulunkulu? 25Nxa abafileyo sebevuka kabayikuthatha loba bathathwe; bazakuba njengezingilosi ezulwini. 26Mayelana lokuvuka kwabafileyo – kalibalanga yini encwadini kaMosi, emlandweni wesihlahla, ukuthi uNkulunkulu wathi kuye, ‘NginguNkulunkulu ka-Abhrahama, uNkulunkulu ka-Isaka loNkulunkulu kaJakhobe. 27KasuNkulunkulu wabafileyo, kodwa owabaphilayo. Lilahlekile kakhulu!”

Umlayo Omkhulu Kuyo Yonke

28Omunye wabafundisi bomthetho wafika wabezwa benqekulisana ngamazwi. Ngokubona ukuthi uJesu wayebaphe impendulo enhle, wabuza wathi, “Phakathi kwayo yonke imilayo yiwuphi oqakatheke okudlula yonke?”

29UJesu waphendula wathi, “Oqakatheke okudlulayo yilo: ‘Zwana, wena Israyeli, iNkosi uNkulunkulu wethu, iNkosi yinye. 30Thanda iNkosi uNkulunkulu wakho ngenhliziyo yakho yonke langomphefumulo wakho wonke langengqondo yakho yonke langamandla akho wonke.’ 31Owesibili yilo: ‘Thanda umakhelwana wakho njengoba uzithanda.’ Kawukho umlayo omkhulu kulale.”

32Indoda yaphendula yathi, “Utsho kuhle, mfundisi. Uqondile nxa usithi uNkulunkulu munye, kakho omunye ngaphandle kwakhe.

33Ukumthanda ngenhliziyo yakho yonke, ngokuzwisisa konke kwakho langamandla akho wonke, lokuthanda umakhelwana wakho njengoba uzithanda wena kuqakathekile kulayo yonke iminikelo yokutshiswa lemihlatshelo.”

34UJesu wathi ebona ukuthi uphendule kuhle wathi kuye, “Kawukho khatshana kombuso kaNkulunkulu.” Kusukela kulesosikhathi kakusabanga khona owaba lesibindi sokumbuza eminye imibuzo.

UKhristu UyiNdodana Kabani

35Kwathi uJesu efundisa emagumeni ethempeli wabuza wathi, “Kungani abafundisi bomthetho besithi uKhristu uyindodana kaDavida na? 36UDavida yena ngokwakhe ekhuluma ngoMoya oNgcwele wathi: “ ‘INkosi yathi eNkosini yami: “Hlala kwesokunene kwami ngize ngibeke izitha zakho ngaphansi kwezinyawo zakho.” ’

37UDavida yena ngokwakhe umbiza athi ‘Nkosi.’ Pho-ke angaba yindodana yakhe kanjani?” Ixuku labantu elikhulu lamlalela ngokuthokoza.

38Wathi elokhu efundisa uJesu wathi, “Libananzelele abafundisi bomthetho. Bathanda ukuceca ngamajazi aphephezelayo njalo babingelelwe emisikeni, 39njalo bathathe izihlalo eziphezulu emasinagogweni lezindaweni zokuhlonitshwa emadilini. 40Baphanga izindlu zabafelokazi njalo bazitshengisele ngokwenza imikhuleko emide. Abantu abanjalo bazajeziswa kabuhlungu.”

Umnikelo Womfelokazi

41UJesu wahlala phansi malungana lendawo yokunikela wakhangela inengi libeka imali yalo enkongozelweni yethempelini: Izikhulu ezinengi zaziphosela imali ezwayo. 42Kodwa kweza umfelokazi ongumyanga waphosela okuyizicetshana kwethusi okubili okulingana lengxenyana yendibilitshi.

43Esebizele kuye abafundi bakhe uJesu wathi kubo, “Ngilitshela iqiniso ukuthi umfelokazi lo ompofu ufake okunengi enkongozelweni kulabo bonke. 44Bonke baphe ngokwenotho yabo, kodwa yena ebuyangeni bakhe, uphosele konke alakho – konke abemele aphile ngakho.”